練馬師李易達對上兩季都贏唔夠數，今季起每一季都係護級戰，一場頭馬都不能少，否則就會冇牌被逼收檔。自己知自己事嘅佢矮仔上樓梯，一步一步嚟，呢晚第四場四班1650米同澳洲騎師柏寶聯手贏「其樂無窮」，此駒初跑谷草一哩，後上一擊即中，爆18倍冷W開齋，亦成為騎練繼「白玉凱旋」後，今季另一匹合作頭馬，令李廐贏出季內第五Win，不過只係15Win指標之三分一，仲要繼續努力。
柏寶今季同李易達合作其實唔多，效果卻相當好，皆因計埋「其樂無窮」在內，兩人累積攜手五戰，獲兩冠一亞一殿，入Q率有六成。
講番「其樂無窮」，直路內閃側住個頭跑，都可以輕易衝贏亞軍「競駿才子」，四班擺明超級，後駒隔一周匆出做二奶，「競駿」系馬今季仲食緊齋，第三名係落班換潘頓之「育成群駒」，三重彩每注派七千幾銀好和味。
李易達表示「其樂無窮」是1600米馬，之前中短途曾有好走勢，今仗跑1650米有18倍可算超賠率，賽前他有建議馬主投注多少，但馬主葉志輝回應自己好少賭錢，所以没有多下注，純粹享受勝利喜悦。李易達指出，柏寶認為馬兒常慢閘，提議加羊毛面箍，結果此招成功。