商務及經濟發展局局長蘇錦樑真係人如其名SO包容，事關喺一男子拒向港視發牌之際，身為狼班子一員嘅佢，卻公然向港視送上一籃子賀禮，自爆已經率先裝咗港視，等住稍後慢慢睇。佢噚日仲以神秘嘉賓身份亮相港視開台禮，仲打埋襯到絕嘅綠色呔，以大粉絲姿態同魔童做孖公仔。相信呢兩位男士喺度hehe，一定激到一男子哼哼聲。
fb補飛話出席無綫台慶
港視噚日舉行開台午宴，賓客幾乎到齊時，卡片蘇突然而至，成為特別嘉賓。原來立法會噚日突然因為衝擊事件而停會，令到一直唔敢應承出席嘅卡片蘇，突然有時間可以現身恭賀。
佢一到場就賣口乖，話對港視開台好高興，希望港視可以製作更好節目，仲自爆前幾日已經開始接收港視訊息，覺得好順暢，聲言自己嘅兩部iPad、兩部iPhone同一部智能電視，都已經裝晒HKTV嘅程式，但由於要返工，未有機會睇晒成套港視電視劇，噚日席間睇過劇集片段，大讚高質素。
其實魔童早前已經透過冰桶挑戰，同卡片蘇冰釋前嫌，事關大家都有眼可見，阻撓港視嘅只係一男子，唔太關曾為港視開唔到台而哽咽嘅卡片蘇事，而魔童噚日見到對方捧場都多謝佢撐港視，仲學許sir重申「阻撓港視嘅只係一男子」，而呢名男子，「我哋請唔到佢嚟」。
查實喺港視開台之日，亦係無綫台慶，唔知卡片蘇係咪驚順得哥情失嫂意，噚晚專登喺fb補飛話，除咗去咗賀港視，亦出席咗無綫台慶，而且更煞有介事特別申明，免費電視牌照嘅問題，「從來都不是一個人作決定的」，莫非一男子又出手，怪責卡片蘇同魔童笑笑口？
李八方
mailto:[email protected]
港視開台Timeline：
http://bit.ly/1xPjXK3
（建議以平板或桌上電腦瀏覽）