一匹馬勤操猛練，當然係準備出賽爭取成績啦，但告東尼馬房隻三班馬「飛快叻」，八月操到家陣未停過，大閘亦試過三次，最近一次同啲一班馬試，走勢更唔錯，但今季仍未出賽，究竟搞乜呢？原來唔係隻馬本身有問題，而係被禁止出賽，事關馬主林家權最近被終止馬會會籍，話說去年7月中，證監公佈一位與林家權中英文名相同嘅人士，因粉飾財政狀況活動，遭證監撤銷牌照，唔知林家權失去馬會會籍，係咪同呢件事有關呢？
「飛快叻」上季贏過谷草1000米，強如「信眼光」嗰場只得第三，五歲好精壯嘅「飛快叻」家陣無法上陣浪費光陰，真係有啲可惜。一般嚟講隻馬有兩個下場，一係退役，一係招標易主。由於「飛快叻」係林家權一個人名下，無合夥馬主，所以唔太可能將權益轉畀其他人。其實林家權同佢爸爸林作輝，都係資深馬主。林家權養過「飛快威」、「飛快贏」等多駒，成績最好係四捷嘅「飛快勇」，而林作輝嗰件紅黃綵衣，大家應該有印象，過去「大家平安」五捷，「大家勝利」四捷都係好馬。究竟「飛快叻」今季前途係點，有冇機會復出，就要拭目以待了。