年初至退休享清福嘅警務處前助理處長蘇錦成，話咁快就搵到好路數，就係投身李嘉誠門下，做和黃地產嘅物業管理總經理，相信蘇sir有排唔使憂喇。
蘇sir服務警隊嘅時候，做過O記高級警司，參與過「魔警」徐步高案同埋「賊王」季炳雄案，今年初退休前做到新界北總區指揮官，個朵都算相當響。今個月初正值雨傘運動期間，蘇sir正式打誠哥工，主要係做吓物管、保安同埋人事管理，相信對佢嚟講只係easy job。
但政府批准佢呢份新職之時，又整咗項幾有趣嘅限制，就係除非警務處認為有需要，否則蘇sir唔可以同警務處有直接或間接聯絡。請問冇需要嘅話點解要聯絡？若果真係要聯絡，又點會冇需要呢？