在本星期一，萬眾期待嘅滬港通正式啟航，點知真係唔係香港小虎隊嘅金曲「伴你（我）啟航」咁好景，相反哥哥嘅金曲「停住這『風』」最應景，oh baby，哈哈。
周一做完中港財經節目聯線後，一見到「北上同南下」唔對辦，同大家話好快爆，quota掃晒有好大分別，之後係點就唔使講！喺跟住嘅兩日，情況更為不妙，無論北上或南下均見收縮。
勿被滙兌影響回報
最緊要係大家以為一通就會全面開通，啊，原來大家都係睇唔通，即日鮮無咗，滙價闊咗，內地券商嘅口號係「直接到香港開戶」，無謂俾滙兌影響你嘅回報！
Prof J覺得，小加話為「安全起行，按時加速」，上海係令到阿爺放心開車嘅原因，更重要係打鑼之後嘅歷史價值，以市值計全球第二，以交易量睇全球第三，研究數據計過，A股同GDP嘅關聯度大約有0.55（以過去七年計），H股只係得0.41。
Prof J每個月差唔多有一半時間喺內地，開通後繼續獲邀同內地投資者講滬港通，內地股市嘅散戶上次驚咗，今次停一停諗清楚都係啱嘅！
加上以我的眼目，呢排更加喜歡係二、三線約20億元市值以下嘅股票啦（若買騰騰，使鬼聽我哋講咩），炒股中盛資源（2623），獲納入MSCI中國成份股。短期仍具備炒作因素。而近期軍工概念瘋炒，廣船（317）復牌不久已升至900倍市盈率。
MSCI指數檢討將於11月25日收市後生效，追蹤MSCI指數的基金，發現有基金偷步入市，可見基金有追貨壓力。
正所謂剛剛遇到啱啱，人民幣兌換上限拎走咗後，喺稅務又話有着數，在初期內地及香港均免收所得稅。當然，大方向中必然有沙石，最緊要係大家喺市場上嘅轉變上，心態有冇跟住轉，繼續追蹤，出發！
徐燦傑
齊魯國際控股首席策略總監
本欄逢周四刊出