一家人對佔中有唔同意見，有乜咁奇？白鴿黨主席劉慧卿支持佔中之時，佢阿哥劉醒雄則入稟小額錢債審裁處，向佔中發起人之一嘅戴耀廷追討，聲言因為受到佔領行動影響而額外支出咗$314.6交通費，案件下月2日審理。
劉醒雄喺申索書表示，上月6日由黃泥涌峽道屋企去中環，慣常搭開6號巴士，每程車費$2.7，來回$5.4，但因為戴耀廷發起佔中，搞到6號巴士去唔到中環，令佢要改搭的士，車費達$320。佢最終將的士錢扣除來回巴士車費後，向戴追討近$314.6費用。卿姐對此點睇？佢對傳媒話事前唔知阿哥入稟，強調包括佢阿哥在內嘅所有人都可以做自己想做嘅事。