噚日正日生日嘅鼠王芬，突然搞咗場「倡議調解，尋求共識」記者會，遭歷史性罷免律師會會長一職嘅林新強、原本要開鄉議局執委會嘅律師會前會長何君堯，都畀面捧場，林新強對住壽星女仲笑得好開心。鼠王芬話希望透過調解員，向為政改拗餐死嘅人士提供「政治調解」，至於具體點樣「調」法，佢同現場人士講極都講得唔太清楚，最終只稱最好由政府成立跨黨派平台去調一調。生日有乜願望？鼠王芬話最希望香港大和解，所以先選擇噚日開記招，透露囝囝噚晚已搵咗佢食飯慶祝，一班經民聯黨友則透過電話短訊送上祝福，八方建議佢不妨再落佔領區行個圈，相信聽到好多人唱生日歌。