AO廣播處長鄧忍光一早夠鐘走人，港台中人向來極度抗拒由AO空降外行人領導內行人，政府委託獵頭公司招聘，都相當頭痕，事關有經驗、有江湖地位嘅資深傳媒人買少見少，亦唔係個個願意接呢隻燙手山芋。江湖傳聞，有兩位資深傳媒人若然肯屈就，肯向獵頭公司點頭，應該極有機會跑出。邊兩位人物咁巴閉？專欄作家曾智華就睇好「霸氣L」同埋「內斂M」。
黃華麒睇好文樹森
究竟霸氣L同埋內斂M係何許人也？八方聽聞，霸氣L者，即係人稱燦哥嘅傳媒大佬羅燦是也。燦哥係中文大學新聞系畢業，份人重情義，得到唔少傳媒人擁戴，佢係多個媒體嘅開國功臣，曾為《蘋果日報》、有線電視、now新聞台開山劈石。佢𠵱家喺數碼廣播公司做行政總裁，有晒做電視台、電台同報紙經驗，一定壓得住場。
至於另一位內斂M，聽聞係資深傳媒人文樹森，佢喺TVB、《明報晚報》做過寫作人同記者。1981年加盟新加坡電視機構，帶領綜藝組。後來成為新傳媒星霖電影公司董事經理。文樹森現為浸大傳理學院電影學院副總監兼首席講師，當年「獅子山下」署長黃華麒2011年退休，都推薦過文樹森接任。八方聽聞，港台中人對燦哥印象好啲，但都係嗰句啦，廣播處長呢個位，係由政府「篩選」，唔到員工話事囉。
李八方
mailto:[email protected]