半山豪宅寸金尺土，富豪業主紛紛惜貨，唔捨得賣。樓齡將近花甲，由前澳門賭王傅老榕家族持有嘅東半山司徒拔道46號眺馬閣，喺城規會份申請文件中，漏咗口風出嚟話想幫幢樓搞重建，𠵱家先申請擴闊車輛通道作為第一步。
傅老榕家族一向好低調，但項目嘅大業主，即係傅老榕長子嫡孫傅厚澤就曾經講到明，幢樓係祖業，而且傅老榕有份參與設計，具有深厚感情，故只租不賣。
多年來，唔少電影明星，例如「紅姑」鍾楚紅、歌星陳慧琳及林子祥葉蒨文夫婦都做過租客，同區周邊都有唔少名人聚居，歌神張學友、天后容祖兒同前政務司司長陳方安生等人都住呢區。
成塊地面積超過5,100方呎，今次申請擴闊現有車輛通道，係希望可以符合現今緊急通道及安全設施標準，至於重建成點，到𠵱家都仲係一個謎。
聽搞開東半山豪宅班代理講開，成幢樓風水好好，望晒維港景，但裝修就好普通，所以租金唔算貴，一般租30幾至40幾元一呎，隨時平過近期熱爆嘅劏房。