由細到大，我都當我阿爺係偶像。《大時代》入面方展博個師傅葉天，股神呀可？哼！我肯定如果葉天真有其人，又如果我阿爺仲在生，我阿爺一定勁過佢。
「James，今日咁遲呀你，滬港通開波呀。」「唉，冇計，好衰唔衰遇著撞車，塞車塞到呢。」出師不利咪就係咁，食大茶飯前，竟然俾Peter仔寸到應一應。不過，我以爺爺嘅名義起誓，今日滬港通開波，我一定盡一個全能經紀所能，幫啲客炒鑊勁！
上晝9點鐘，喺電視見到李小加笑笑口嘅樣，我認，我一向唔多妥佢，當時亦諗緊一個唔出得街嘅字眼。不過呢個時候，都唔理得佢咁多，因為電話開始響起了，「James，幫我掃港交所（388）。」呢個Moment，心暗叫一句：「起飛啦！」係，4月嘅時候，我都因為炒滬港通，講過一次「起飛啦！」之後仲車毀人亡！不過今次係堅開車，冇事嘅，港股係時候擁抱大陸無限散戶嘅資金！「係嘅，沈生，幫你搞掂佢。」
「曾生，海通（6837）呀嘛，券商股，今日Sure Win啦！」「大連港（2880），呢隻唔錯呀，AH折讓大。柯生，放心，滬港通炒呢啲啱架啦。」「Good morning，Mr.Poon！OK，Tencent（700）buy！」望一望Office四周，電話係咁響，大家氣氛幾咁歡愉，未開市就咁旺場，你話遲下點算好。阿爺教落，做人唔好咁易自滿，不過望住呢班直通車開出，依家見到李小加都唔知點解突然變得和藹可親。
＊＊
不過，世界有咩慘得過中伏？就係中兩次伏！
望住恒指開市後個點數越來越細，支陰燭越來越長，我…真係…完全唔識反應。身邊啲同事，開始變得歇斯底里，「北上嗰130億Quota用得好快，點解港股通嘅Quota消耗得咁慢？」「唔係呀嘛，港股真係冇人吼？」「大陸今次真係昆我哋，借香港過橋！」「388越跌越多呀！」「啲概念股全部散晒」。我好希望，今日發生嘅事，係假嘅。
好唔容易捱到收市，血流成河，屍橫遍野。電視再見到李小加，Sorry，我唔想再見到佢。如果佢有份拍《星際啟示錄》，佢一定係個博士，即係昆你有Plan A、Plan B，吹到滬港通對香港有幾好，其實佢根本從來冇理過港股死活，由頭都尾都係想殖民，帶啲錢返大陸。
我好嬲，收工後我行出公司去呼吸新鮮空氣，街上雖然照舊人流如鯽，但我感覺到世界好似曾經停頓過，然後，好似有啲嘢唔同咗，但我又講唔出係咩。
行經地產舖，見到佢其中一張Poster，大大隻字寫住「玖瓏山 九肚山 豪宅地段 公屋價錢」呢個係咩世界，萬幾兩萬蚊呎，你同我講公屋價錢？不過當我竟然走去信滬港通？我知道世界一定有人信呢張Poster。
呢一刻，我唔知自己應該點。我知我咁做好低能，但我真係好想同爺爺呻，我走去WhatsApp爺爺生前個電話，「爺爺，我對你唔住。點解我會咁蠢，以我嘅智慧，冇理由唔知滬港通係假大空。大佬人連A股都炒唔掂，仲走落香港同你炒港股？開玩笑！呢個世界錯晒，政府呃我、滬港通呃我、地產Agent呃我！但我知，爺爺一定唔會呃我。」
講完，我舒服咗啲，不過之後發生嘅事，令我好淆底，真係…好淆底。因為，我啱啱Send出去個Message，竟然見到兩個「藍剔」，仲有回覆，「衰仔！」
點解，點解會有人覆，阿爺明明過咗身，然後WhatsApp頂見到佢出現「Typing…」，咩料呀！我係咪發緊夢。
「你係咪咁蠢呀，阿爺講嘅嘢你唔聽，你走去信阿爺搞嘅滬港通？我咪一早通晒水俾你，你今朝見到人『撞車』呀，係『撞車』！你仲咁蠢上架直通車？好啦，見你唔明，我再通水，你今朝頭幾個客姓咩？，姓『沈Shum』、『曾Tsang』、『柯Or』、『潘Poon』，你明唔明呀，叫你STOP呀！！！！點做我個孫？」
望住呢個STOP字，我覺得我有啲唔妥，然後…
＊＊
「James，起身啦，有冇搞錯，你竟然返公司瞓覺？」我望一望Peter仔，我唔多知我喺邊樹，佢繼續講，「一陣滬港通開波啦，好衰唔衰遇著撞車，塞車塞到呢，搞到我遲咗返。」係，終於記得，我喺公司。呢個時候，佢拎起電話，「喂，沈生，港交所，幫你搞掂佢。」
完
by千頌C@堆填區
http://fb.com/winbigwok