滬港通一開閘就脫腳，對唔少A股散戶戰友嚟講，反而是意外之喜。佢哋炒慣細股、創業板股，炒到㷫恰恰。創業板市盈率已經超過60倍，係人都知有泡沫，最驚啲錢走咗去香港撈貨，咁就散水玩完。港股通冇料到，內地創業板、中小板指數連升兩日，成為贏家。
呢種港股通和創業板之間的奇異反向關係，其實係騰訊（700）和騰信（300392）呢對「沙煲兄弟股」身上完美體現。
騰訊是香港股王，巴閉之處毋須講；騰信則是內地「山寨股王」，公司今年9月上市，兩個月內股價爆升5倍，本月初升到179元人民幣，力壓A股傳統股王貴州茅台，成為第一貴價股。
騰信從事互聯網廣告，業績平平無奇，現在市盈率已超過120倍，咁樣冇厘頭升法，業界猜測，是炒家以為公司與「真股王」騰訊有關係，借勢炒上。但其實兩者名字雖相近，卻毫無關係。
滬港通前夕，騰信股價開始暴跌，上周五仲跌停板，交番個股王寶座畀茅台，但呢兩日跌勢開始放緩。港股通使用額度超低，顯示內地啲錢唔會輕易落來，散戶可以放心繼續party。
李可強