重慶機電（2722）有注資concept唔在講，而且喺重慶國資委直屬八家國企當中，重機又至平靚正，股價表現，點止如此這般？
重慶國資委有八間國企，當中，有對應A股嘅，只有重鋼（1053），係冇預測PE，但食住滬港通政策，炒AH股差價下，半年嚟，幾乎翻咗一番。就算計埋呢兩日回吐，重鋼都累升咗65%。重機又點？同期升咗28%，只係重鋼一半升幅。
改革注資概念齊晒
家陣國企透過整體上市進行改革，或者中資注資憧憬，呢期就引發老牌粵投（270）、中旅（308），同珠控（908）等等爆升。重機直屬嘅重慶市國資委，今年第二季頭，重慶市已經發佈未來三至五年，進行旗下國企改革，重機亦講明會獲注入優質資產，呢壇製作，遲早問題。
至於阿爺另一壇新製作「絲綢之路經濟帶」，場內推斷，隨住經濟帶開波，未來衍生出嚟嘅經濟規模，又係上萬億銀人仔計數，重機亦係食到應一應。又連埋上邊重鋼，家陣中港兩地，有八間直屬重慶市國企，當中，重慶港九1.8倍PB、渝開發1.8倍、重慶百貨1.9倍、渝三峽3.7倍、涪陵電力4.4倍、太極集團5.3倍，重機家陣PB得0.7倍，係繼慶鈴（1122，PB 0.68倍）之後，重慶市屬公司裡面，最平選擇。
仲吸引係，重機家陣得PE 7.6倍，只係輕輕手估，今年實際盈利增長10%咁大把，預測PE得6.8倍，喺八間上市公司裡面，重機PE平霸。講concept，重機有齊祖國熱炒concept，講基本面，亦正到爆，以咁嘅PE水位，遲早向上爆邊。買重機，煲上邊幾瓣嘢，現價1.34元中線當翻一番到2.7元計，PE都係得13倍幾，比對好似涪陵電力50倍水位，算係乜？
錢雋
細價股專家
本欄逢周二、三、五刊出