扶貧委員會本月底舉行最後一次會議，下個月換屆，大部份委員獲續任，但有唔少小組委員獲「升呢」。好似華人置業主席兼行政總裁劉鳴煒，本身只係扶委會轄下社會參與專責小組委員，以及關愛基金專責小組增補委員，八方聽聞今次佢有得「坐正」，獲委任做非官方委員。
劉鳴煒係唐營大好友，曾任唐唐競選辦副秘書長，唐唐任政務司司長時係關愛基金主席，劉亦獲任為委員，但狼振英一上場就被降格。今次再度坐正，唔知有乜玄機？另一個坐正嘅係世界銀行全球養老金局前總監冼懿敏，佢本身係扶委會社會保障和退休保障專責小組委員，呢個小組喺新一屆會併入大會，睇怕扶委會主席林鄭月娥都係睇中佢對退保嘅認識，可以幫手打場硬仗。