鄉議局噚日開執委會，公佈27個鄉事會還路於民簽名嘅成績表。估唔到考第一嘅，竟然係有名叫做孱仔強嘅鄉議局副主席林偉強嘅辦事處，佢只係擺咗四日街站，就獨得齊頭6,000個簽名，足足拋離排第二、莫錦貴做阿頭嘅沙田鄉事會嘅4,905個，亦比戰鬥力極強、侯志強領軍嘅上水鄉事會嘅4,043多近2,000個。
孱仔強平時睇起上嚟咁花弗，估唔到為阿爺做事咁賣力，佢仲專登拎埋街站相出嚟證明佢嗰6,000個簽名冇水份、冇惡搞。咁賣力交功課，莫非為村代表選舉鋪路？佢耍手say no，話自己老喇，留番畀啲後生爭喎，佢自爆喺馬鞍山、大埔都有擺街站，擺明跨區搵食。至於包尾嘅則係青衣鄉事會，竟然係零個簽名捧大蛋，可能阿爺因此打佢哋手板。