騎師贏馬，已經有獎金落袋，但如果再捧埋盃，喺頒獎台上受到馬迷歡呼，係咪更過癮呢？
開季以來，谷草先後跑過四項盃賽，潘頓三次列陣，順序於公益金盃、滙豐百周年紀念碗及愛爾蘭錦標，夥拍「贏到爆」、「皇者拍檔」及「大寶藏」取得兩W一P全上名，乃表現最佳之騎師。今次谷草第六、七場，分別上演美國會所挑戰盃及日本中央競馬會錦標，潘頓分別騎孫廐「強中堅」及方廐「準備就緒」參賽，兩駒同屬谷戰能手，睇嚟潘頓又有機會擺定pose影相。
第六場「強中堅」谷草只在同程1800米贏過，該役評70分，現時僅高一分，今仗打王牌兼換潘頓，擺出必拼姿態，有幸抽得四檔靚位，騎練可繼「包裝鬥士」後，再度聯手贏馬捧盃攞威。
第七場「準備就緒」谷草兩戰一冠一亞，剛戰田草熱倒，匆出易配潘頓兼回師強項谷草一哩，人馬合作六戰兩勝三位一殿，適逢盃賽場合，鬥志更加毋庸置疑。