蔡約翰馬房公認惡馬多，但某啲實力馬往往長時間「失踪」，好似上季香港一哩錦標盟主「精彩日子」，今年6月遠征日本安田紀念賽後，已經缺陣約半年，雖然近期有操練，但就冇報本月23號馬會一哩錦標，家陣情況係點，真係一個謎。
另一匹一哩怪傑「魚躍鳥飛」，上季尾連贏三場，絕對實力強橫，其中煞科日短距離壓倒「駿馬名駒」，更盡顯鬥心，不過今季又係遲遲未出賽，隻馬呢日（18日）出嚟試大閘，喺雷神胯下走勢相當好，輕鬆透出擊敗當勇嘅「飛哥」取勝，早前喺1600米贏馬嘅「星爾頓」只得第四，所以呢組試閘水準唔錯，「魚躍鳥飛」嘅狀態應該好Fit吓。但「魚躍鳥飛」家陣嘅情況好尷尬，只評101分既冇報名國際賽，現年五歲亦冇資格跑季內一系列四歲馬大賽，中短期內想升呢成為蔡廐大賽籌碼，係好困難嘅事。
另一方面，呢朝高廐「大印銀紙」喺另一組大閘跑第二，輸畀隻冇乜名氣嘅「勝利大路」，好多人因為同主馬「大運財」嘅緣固，因而吼實「大印銀紙」，認定佢係馬主潘蘇通另一大賽希望，不過「大印銀紙」其實仲未有評分，喺外地只贏過1400同1600米低獎金普通賽事，估計只會插三班起步，就算真係有高質素，都未必夠時間爭經典一哩賽入場券囉！