喺香港馬圈，只要你有本事，就算在港資歷好淺冇乜靠山，亦可以財源滾滾，好似意大利型男騎師杜滿萊，就係好例子，本月2日佢喺香港展開客串期，只跑咗半個月四次賽事，已攞到4冠3亞成績，4場頭馬分別係「搖錢樹」、「星航渡」、「包裝鬥士」及「超有利」，大家知唔知佢個人收入有幾多呢？獎金就大概有33萬，策騎費3萬4千元，總共36萬4千港元，仲未計馬主打賞，真係羨慕死人囉！
杜滿萊騎功好又受練馬師歡迎，實力座騎源源不絕，今次谷草夜馬，好大機會繼續豬籠入水。第五場佢嘅「大寶藏」上次跑同程贏得好easy，呢匹馬10戰谷草1200米半數入圍，趁勇當然唔會留手啦。仲有尾場「醉喜」，上仗賽前發脾氣，撞傷練馬師葉楚航細佬，情緒欠穩定之下，都跑得唔錯，輸唔夠兩身位得第五，今次由華將梁家俊一下子換上杜滿萊，戰鬥力增強唔少，跑番贏馬嘅谷草1650米，對手大大減弱，真係唔好睇低呀！