佔領運動持續個多月，越嚟越多人唔耐煩，又話撼動唔到北京、又話抗拒禁制令動搖法治。但喺國際社會眼中，香港不知幾令人羨慕。國際企業顧問公司「Good Corps」旗下刊物《Good Magazine》發表「2014好城市排名」，香港由上年嘅24位狂升23位，榮登榜首。
《Good Magazine》介紹香港時，第一段就提到佔領運動：「曾幾何時的小漁村，成長為中西橋樑，不僅重投政治覺醒，更告訴全世界，狂熱的示威一樣可以極之文明」。雜誌形容雨傘運動係植根於互相尊重、表達自由，同埋對實現夢想嘅持續信念。喺眾多令人難忘嘅場景中，雜誌特別提到金鐘連儂牆，認為佔區內嘅連串藝術表達手法，打破咗香港素來所有公眾活動都需要政府批准嘅習慣。