幫楊受成打工嘅英皇國際（163）執行董事張炳強十分愛才，佢哋嘅新盤干諾道西180號「維港峰Upton」，搵「香江第一才子」陶傑改名㗎！
陶傑話：「改名改得靚，係成功嘅開始。」佢解釋，樓盤名呢個up，唔係齋噏個噏，係up and coming，蒸蒸日上個up，係up climbing，向上流動個up，向上游，游去上流。
英皇呢個樓盤位處西環，陶傑打趣話，西環有少少敏感，啲人可能驚驚哋，但家陣唔怕啦，加咗一浸英國味，Upton係倫敦東部上流社會地區，當堂唔同晒。
「西環又係香港最古老嘅地方，最古老嘅地方叫Downtown，日後你係Upton嘅業主，話畀人聽Ｉ live in Upton in Hong Kong's Downtown，人生有起有落」才子果然好文采。