滬港通玩咗一日後，發現港股世界彷彿穿過蟲洞，去咗宇宙嘅另一邊。噚日朝早先發現，你一向信賴嘅報價機，原來喺今日幫唔到你好多。你想睇滬股通20大排名，你搵唔到；想睇額度餘額，你又睇唔到。最後兜兜轉轉，你竟然去番啲免費嘅網站反而仲齊。我當你有興趣想炒A股啦，你又睇唔到A股盤路。噚日隻梅花生物（600873）升咁多，你想睇佢做啲咩，去到內地最大路嘅財經網新浪財經，望住一片混沌嘅版面，到底內地股民點忍到一個亂到九彩嘅網站？
你轉移陣地，直接google間公司，click入百度百科，佢load一世都load唔到。經過呢一日戰鬥，反映最少三件事：一，由滬股通額度消耗快過港股通咁多，睇得出香港真係冇so；二，一眾之前炒到癲嘅滬港通概念股全部散晒，走去炒啲平貨好似人和（1387）、波司登（3998）呢啲平嘢，喺內地散戶攻陷下，基本因素未來可能會變得冇咁重要；三，而家要時間適應新玩法，暫時寧願玩啲非港股通股份。
威鋮（1002）噚日急升25%，公司公佈折讓兩成配股籌1.17億元，仲要揀冇咁靈活嘅純新股配售，已經令人有遐想。完成後公司由原來負債1.95億元，變成持有3,600萬元淨現金無負債公司。股價創新高，加上公司乾淨，話佢有注資憧憬唔過份，可以一博。
Fifi
http://www.facebook.com/lovefrystock
本欄逢周二、四刊出