有律師唔做，一心要入娛樂圈做模特兒嘅翁靜晶大女劉萬儀，噚日第一次以女模身份出騷，佢同吳千語、馬國明緋聞女友徐佳琦等，喺尖沙嘴出席Swatch活動。低胸打扮騷住手錶出場嘅萬儀畀自己70分：「第一次做騷，表現有啲緊張。」是日低胸打扮係咪底線？萬儀笑話：「喺香港算係偏性感，但外國就唔同，如果要再性感啲都會同媽咪講，平時喺屋企就會，出街就唔會喇！」之前有話翁靜晶唔多高興個女入行，萬儀話有叫媽咪嚟撐場，不過媽咪有嘢做唔得閒：「媽咪唔係嬲嘅！佢好支持，今次佢真係有工作，佢都有叮囑我做嘢要小心同做番自己。」
千語想生仔
至於林峯早排漏口風話想搵攝影師陳漫影婚紗相，千語冇回應幾時結婚，只話唔想同仔女有代溝，希望35歲生仔，佢仲同林峯解畫話：「佢係話想搵陳漫影專輯相，我拍廣告都着過好多次婚紗，所以唔似一般女仔咁有幻想。」
同場仲有羅孝勇女友夏意瑩及同馬國明傳緋聞嘅徐佳琦。
撰文：馮仁昭
【三個粉絲去首爾】
追星實錄，即上韓劇讀： http://hk.apple.appledaily.com/kstar