中國楓葉教育（1317）係內地國際學校辦學團體，今日開始喺香港招股，噚日記者會上，只得31歲嘅聯席首席財務官（Co-CFO）徐斌現身說法，原來佢係楓葉校友，畢業之後負笈多倫多讀大學，再去劍橋讀埋碩士。
學校創辦人任書良（圖中）又自爆，喺佢親戚入面，有6個小朋友都係楓葉高中嘅畢業生，佢伺機賣花讚花香，話如果呢班細姪讀內地大學，就只會「非常普通」，從楓葉畢業之後，就個個都入到名牌大學喎。
學校嘅加拿大校監James William Beeke（圖左二）由1996年起，做咗10年加拿大英屬哥倫比亞省政府教育部視學官，佢加盟楓葉後，兩個寶貝孫女亦入讀楓葉旗下學校。唔似得香港高官，送晒自己啲仔女去外國浸鹹水，懶理香港教育搞成點。