中國玻璃（3300）啱啱喺月頭宣佈，配股畀中國建材集團旗下全資附屬，後者中國建材，係阿爺點名首批六間試點、重點改革央企之一。中玻呢吓引資中國建材，好有遐想。
三大星級股東坐鎮
中玻呢次協議以每股0.94元，配股畀中國建材旗下全資附屬，比中玻當時造價冇折讓。又呢壇製作，若果順風順水，中玻將會有中國建材（揸中玻14.36%）、聯想控股（992，22.8%）同日本Nippon Sheet Glass（21.55%）三大超級大孖沙坐鎮。有星級股東，喺嚟緊日子，包括引進新技術、產品同定單，去湊大中玻，係好正常諗法，中玻比起行家，亦已經好着數。
又上個月中，祖國報載，六大央企改革開波，兩個星期後，中玻就獲中國建材睇中入股，中玻又有冇機會享受中國建材改革下嘅注資湊大？呢吓嘢，有遐想，話晒中國建材總資產值高達4,000億港元，唔係嘢少。
咪扯咁遠，中玻現價（1.04元）唔係比起上邊協議配股價高好多，家陣得0.6倍PB。場內信義玻璃（868）PB，係講緊1.4倍，又停咗牌嘅洛陽玻璃（1108），PB高達22.8倍，中玻就算比對信義，都平咗57%。
而據摩通喺9月時，就玻璃行頭所發新鮮熱辣研究報告講，話祖國浮法玻璃最壞嘅時刻已經過去，兼且係最佳入貨時機。中玻家陣喺四年半海底價，比2011年高位4.82元，跌咗78%。
場內專業評估今年嘅EPS 8.75仙，預測PE 11.8倍，唔係貴到勁離譜，又若果好似摩通預期，成個行頭turnaround，中玻呢個殘價，就好抵博。當上到NAV1.74元，中玻要升67%，PB先1倍，都仲未追到信義。
錢雋
細價股專家
本欄逢周二、三、五刊出