警方清場在即，但依舊有唔少人喺各佔領區留守，好似上周喺金鐘佔領區帳幕內，被人掟動物內臟嘅肥佬黎咁吖，依舊日日去佔領區打躉，陪住學生喺佔領區倒數。但八方發現，肥佬經常坐鎮嘅帳幕頂，噚日突然多咗個「招牌」，事關帳幕之上竟然貼住「請勿餵食」四粒字，唔少人行過睇到都發出會心微笑。
到底邊個咁大膽，喺肥佬黎頭上動筆？原來係一班佔鐘區義工嘅集體創作。有份搞搞新意思嘅郭紹傑話呀，呢四粒字好有意思，一嚟抽肥佬黎被掟內臟事件嘅水，二嚟因為肥佬黎每次坐喺度，探班打氣嘅人絡繹不絕，配以佢嘅身形，十足十隻被圍觀嘅熊貓咁，所以索性幽佢一默，等大家喺佔鐘嘅緊張時刻都輕鬆一下。