滬港通通車後，本港知名股評人多咗嘢做，每日要望實A股走勢，個別喺中資行打工嘅股評人，又要時不時北上開壇向內地股民介紹香港有乜好股，聽講，內地股民幾鍾意操港式普通話嘅股評人，認為咁樣先至顯得佢哋夠地道，真係識講港股，難怪「曹Sir」曹仁超喺內地咁有市場喇。
曹Sir五年前接受內地《財經網》訪問時，用港式普通話講投資心得，教大家乘「勢」賺錢，呢段訪問被人上載youtube，成為一時佳話，大家覺得曹Sir實在太可愛了。
舊年底由新鴻基金融過檔招銀國際嘅股評人蘇沛豐，今年多咗北上為公司客戶講talk，佢竟然都話唔使操熟「煲冬瓜」。佢指，操港式普通話先至係香港股評人嘅優勢，可以凸顯到香港人呢個身份，講起港股上嚟，更有說服力咁話喎。另一股評人陳永陸亦形容自己嘅普通話十分普通㗎咋。
其實蘇沛豐呢個講法都有些少道理嘅，有得揀，投資者都寧願聽地道內地人講內地經濟同A股走勢喇。
講番滬港通，據聞𠵱家主要係幫中資證券行打工嘅股評人需要北上講talk，陳永陸、黃德几等股評人即使有一定知名度，但暫時未見好多北上邀請。
陸叔郭思治：唔熟A股
調番轉，佢哋又識唔識講A股呢？陸叔好坦白咁話「唔識」，亦「唔充得」，佢好謙咁話，只能掌握到A股整體走勢，或者係熱門嘅10至20隻A股，要逐隻講真係有心無力。
黃德几與郭家耀亦異口同聲承認，講走勢可以應付，但係個別A股，就有難度。大隻佬股評人郭思治坦言，「咁多隻A股點識得晒呀，有人問到咪話唔熟，所以唔答，亦都無時間惡補，無辦法㗎嘞，惟有慢慢吸收啦」。咁都好，起碼佢哋夠坦白，唔會唔識扮識。
李華華
mailto:[email protected]