扭曲賽制，造就魚腩非魚腩，強隊非強隊；今夏世盃後，歐洲球壇恍如另一個世界，不能用常理推測，根據世界排名作實力指標，更會落得焦頭爛額。今年「最後一夜」國際賽，在今晚上演全友賽宴，亦親亦敵的「蘇、英」最具話題性，細佬蘇格蘭作東道，戰意如虹，受讓必捧下盤。
53支歐國外參賽隊伍，大部份踢了4輪，只剩3隊波，安道爾、直布羅陀、阿塞拜疆，仍然零分；其他所謂魚腩相繼出風頭，更僅剩13隊未開勝門。表現最令人失望，筆者認為是世盃冠軍德國，今夏贏巴西7:1，但上周五對同組、未被國際足協承認的直布羅陀，僅勝4:0；更曾兩度被對手攻門中框，險告失波，羞家之極。總計德軍今屆暫時4戰錄2勝1和1負，以海外讓球盤計，捧場全部中伏，成歐洲hea霸之首。今晚德國缺鋼門紐亞，在重量級友賽作客西班牙，後者新軍上仗鬥白俄羅斯所見，缺少王牌箭頭迪亞高哥斯達，中前場球員反而不惜力，向對手後場壓迫，戰意可嘉；既然德國人仍沉醉今夏勝利，狂牛少讓可博上盤。
世盃季軍荷蘭，之前表現一樣糟糕，要軒帥出到辭職一招苦肉計，排4-3-3打今年收爐戰鬥拉脫維亞，才大炒6:0，成過去一輪賽事中最大勝仗；總計今晚續在國際賽登場的24支歐洲隊，以足智彩計，他們過去周末一仗共錄得逾63%入球「細」的比賽。今夜全友賽，更難燃起球星們爭取虛榮的戰意。較值留意是波蘭迎戰瑞士，兩軍上仗賽事皆有直播，同是半場冇交收，下半場發力，大勝弱旅4:0；但見瑞士靠雨戰靠門前狂轟致勝，前線把握力實遠不及排名低32位的波蘭，主W可取。
睇波，任你級數幾高，冇戰意如德國，捱夜也會大呼呻笨；要睇戰意加氣氛，今晚6萬人在些路迪主場，多數為蘇格蘭打氣鬥「大佬」英格蘭，應該會好睇，不離開你，不等於臣服於你。鶴臣世盃後保得住飯碗，領英軍5戰全勝，但除作客贏瑞士較具說服力外，其他表現恰可而已；上仗鬥「斯洛文」的上半場更錄零射門。英軍今戰賽前講明，重用比拉希奴及巴克里等年輕戰將，加上英超周六有阿仙奴大戰曼聯，老鶴不敢得失兩軍的雲教頭，原骨幹球員上陣亦會錫身；而主力中堅菲臘積基爾卡有傷，應付蘇軍煞食高波攻勢，將打折扣。
反觀歐國盃決賽周，玩與眾同樂，鼓勵到一眾小國奮起爭佳績；蘇格蘭成受惠者之一，今屆4戰歐國外，計海外亞洲盤，捧場未輸過，剛戰力克愛爾蘭，相信對戰意提升已至沸點。主隊戰將賽前講明「蘇、英」戰，從不友誼，陣中近無星級球員，在這類友賽，更值看高一線，爆冷贏波亦不出奇。
文：波神