立法會噚日中午宴請各國駐港領事，身為立法會主席嘅曾鈺成到場打個招呼就閃人，原來佢唔係唔畀面，而係因為轉天氣，感冒不適，聲都沙埋要休息，為免傳染就要缺席。點知傍晚時分佢就現身青協搞嘅活動，演講足足半粒鐘有多，其間談笑自若，中氣十足，唔通咁快好番？
佢演講時主動提到雨傘運動，話唔打算呼籲學生返屋企，仲話同過佔領者傾偈，明白對方自覺做緊正義嘅事，但學生通常一往直前，唔識瞻前顧後，又話古今中外社運多由年輕學生做先鋒，但不能一鼓作氣令制度改進，希望年輕人多啲了解複雜嘅社會因素。
講到議員角色，佢就泛民建制各打五十大板，話立法會無做好協調各方嘅角色，但亦幫泛民講好話，話所謂議會不合作運動唔等於泛民冇晒分寸將所有議案否決，舉例議會上周就用咗20鐘通過一條法案。