本欄昨日提及，筆者所識的強國大戶老胡一早話定，內地有錢人要買港股，晨早就買咗，所以港股通唔會有好多錢再來，結果噚日市況就被佢不幸言中。
早排係滬港通臨戰階段，筆者曾「深入敵營」，走去深圳證券行刺探軍情，除大戶外，亦去了解內地散戶想法，好值得同大家分享。
在筆者所去的深圳證券行中，有一位散戶王先生，經常在報價機前大嗌，七情上面，非常投入。筆者問「港股有甚麼最吸引你？」佢答「仙股！」一邊答，一邊搓手，雙眼放光，「香港怎麼會有這麼多便宜的股票呢？」興奮之情溢於言表。請留意，王生口中的「便宜」，唔係講估值平，而純粹係講股價低。
A股股本面值全部都是一蚊，如果要股價跌穿一蚊，意味公司已經有很大虧損。A股連蝕三年就要退市，大股東為保殼，通常會粉飾盈利，或注入資產，令股價重上一蚊。
所以A股極少仙股，即使有，炒落去亦多數贏，形成「仙股可以放心炒」的思維習慣。內地散戶眼中，港股最值得炒係仙股，對主要是指數股的港股通自然難有興趣。
昨日港股通額度用剩83.2%，並非空穴來風。
李可強