滬港通正式開車咁大件事，獲邀參加開市儀式嘅嘉賓當然要拍照留念，最搶眼肯定係金發局主席查史美倫與一班靚太合照，佢哋企埋一齊有紅、橙、黃、綠、藍，只欠青與紫就集齊彩虹七色喇。
根據色彩心理學，查太着住紅色衫到場，喜慶得嚟又夠搶鏡，輕易喺大型場合中展現自信與權威，果然識得揀。企喺查太旁邊嘅深交所總經理宋麗萍選擇綠色，應該都係有諗過度過嘅，事關綠色畀人安全感，喺協調人際關係上扮演重要角色，滬港通之後，深交所應該都想有深港通，趁滬港通開車儀式，搞好各方關係都係常識吧。
證監會副行政總裁張灼華選擇穿橙色，就畀人親切、開朗、健康嘅感覺。最多人着嘅黑色就低調得嚟有權威，難怪咁多行政人員選着喇。