中午的陽光灑在必列者士街上，來往的途人看起來格外活潑。沿途經過Oolaa，坐在餐廳內的飲食男女有說有笑，很星期天。我跟兩個男性朋友一路走着，準備跟另外幾位女性朋友到PMQ吃個Sunday brunch。就在這時候，我們不約而同在遠處看見一位女生迎面走來。她不屬於很搶眼的類型，但五官拼起來就是很吸引人注意那種，笑容比陽光燦爛，再加那件白恤衫和披在肩上的黃色薄冷衫，活脫脫一個Ralph Lauren的亞洲御用model。突然間，你內心會閃起「萬一以後再見不到她怎麼辦」的奇怪想法。最衰佢隔籬有個男朋友。
正當我們斷定她是落入凡間的小女神之際，佢，叉錯腳，仆低咗。好彩佢本能反應快，隻手落地先，冇撞親塊面。小女神冇即刻企起身，我哋以為佢扭親隻腳，本來想扮吓好心，乘機走埋去睇佢有冇事。點知原來佢冇即刻企起身，係因為佢驗緊傷，唔係幫自己驗傷，係幫佢個手袋驗傷。
港女仆低 只顧包包
兩秒鐘之內，小女神現出真身，原來又是港女一名。「死啦！真係花咗呀！」港女開始哭起來，引來幾個途人目光。男朋友踎低，心痛道：「你隻手流血呀，仲顧住個袋！」港女慢慢站起來，但哭得更厲害，好大篤鼻涕。「死啦！點算呀？」佢真係喊得好淒涼，個口擘到好大，陽光映照下見到佢個口裏面有好多口水，名副其實口水鼻涕流晒出嚟。歇斯底里到咁，匪夷所思。細看之下，原來那是Hermès的Garden Party，有錢都未必買到。有次在中環看見才女張寶華，佢就係拎住一個同款的，還有兩條絲巾圍在手挽的位置，係幾靚。
高層次的愛情理論總是說，女人要找個能夠complete自己的男人，才會得到真正幸福。根據我膚淺但廣泛的觀察，能夠complete女人，讓女人獲得幸福的，不是男人，而是手袋。那當然，葉朗程擺明是隻困在中環多年的井底之蛙，見嘅識嘅女人大部份都係百分百名牌奴隸，嗰啲所謂講心唔講金嘅女人，暫時未有幸遇過。
話雖如此，名牌奴隸都有名牌奴隸嘅優點，易𠱁嘛。簡單一個手袋，解決了男女之間許多紛爭，以下是幾個真實案例。
「幾日前已經話今晚食飯，而家先話要同阿強睇波？我真係覺得自己好重要囉！」Ok，Gucci，靠你啦。「儍豬，做乜無端端買嘢畀我呀？我冇嬲呀，你估我真係咁小器咩。飲酒就唔好揸車啦，你今晚同啲friend玩得開心啲！」真係好感動，Gucci，多謝你。
「點解情人節都要business trip？遲一日飛唔得㗎？一句講晒，情人節，同唔同我過？」呢種情況，要出Chanel。「BB！你點知我鍾意呢個袋㗎？去上海小心啲呀，天氣報告話嗰邊得幾度，着多件衫呀，你返嚟我哋再補祝啦，love you！」情人節都有得補祝？親愛的Chanel，我都love you。
「個個朋友都 expect我哋下年結婚，你同我講再遲多年？唔好啦，不如遲多十年啦，都係唔好，不如等我停埋經先結啦！」咁嘅環境，ladies and gentlemen，Hermès一出，誰與爭鋒。「Oh my god！我係唔係發緊夢呀？你儍咗咩！個袋好貴㗎！我諗過㗎啦，我哋再努力多一年，等你升埋做partner先，到時雙喜臨門仲開心！」一個袋竟然可以換多365日嘅自由，Hermès果然神級。
女人尊嚴 增添味道
有很多男士以為，女人愛手袋，因為女人愛美，但其實手袋同貪靚是幾乎沒有直接關係的。我舉一個好簡單嘅例子，你哋就會明白。有一次，我跟一位很要好的女性朋友吃午飯。就在太古廣場走着的時候，女性朋友偶遇另一位女性朋友。基本禮貌，一見到梗係扮晒熱情打招呼，然後話約下次食lunch。她們沒有寒暄太久，所以傾咗冇十秒鐘就往相反方向繼續走。
那短短十秒鐘，雖然我只是站在一旁微笑，但我留意到一個很搞笑的畫面。她們一路裝作很投入的望着對方，但其實每隔兩秒就會用四分三秒贒一贒對方個手袋。兩秒，贒一贒，再兩秒，又贒一贒，足足贒咗三、四次。
由此可見，對於女人來說，手袋放的不只是唇膏和衞生巾；一個手袋盛載着的，是女人的尊嚴。可能好多男人，甚至乎女人，覺得做名牌奴隸是一件既膚淺又可悲的事，但我真的不認為有甚麼問題。買得起又好，買唔起又好，喜歡就是喜歡嘛，又不是殺人放火，有必要說成是敗壞社會風氣那麼嚴重嗎？「有自信，有氣質嘅女人，唔會需要一個名牌手袋去證明自己囉。」咁講真，人哋攞個名牌手袋出嚟，又冇話到係用嚟證明自己，係你咁講啫。其實我覺得，靚手袋有少少似「鹽」一樣。有啲女人本身已經好靚好有氣質㗎，就好像一煲靚湯一樣，又有花膠又有鮑魚，夠晒料啦，但沒有那幾茶匙的鹽，就是帶不出內裏的味道嘛。
戴安娜就是一個很好的例子，她是我們心目中永遠的皇妃，說她集美麗高貴愛心智慧於一身，應該沒有人會反對。如此一位女神，夠完美吧？你看她出席不同場合的時候，身邊總會有個名牌包包，尤其是當年很紅的一個Lady Dior。十次有八次她也會挽着這個袋，唔通你又話佢冇信心所以先攞住個袋？喺適當嘅場合攞住個適當嘅袋，絕對可以給女人畫上完美的點綴。我強調，是在適當的場合，拿一個合適的袋。
曾經出席朋友婚宴，看到有位女士穿着一襲白色晚裝。其實，出席別人婚宴，穿着白色晚裝已經是一件很戇居的事，因為人家女主角的婚紗也多數是白色的。令這位女士戇上加戇的是，她竟然挽着一個巨型鮮粉紅的Birkin。我知，Birkin是Hermès的殿堂級傑作，但着住晚裝拎個巨型Birkin，唔係over咗咁簡單，直情係game over咗。
所以話，有品味，卻沒有錢，只是可惜；有錢，卻沒有品味，才是可憐。
葉朗程