周日嘅ATP年終賽決賽不似預期，費達拿（圖）臨時宣佈退賽，令到萬幾位入場觀眾欣賞唔到佢大戰迪祖高域嘅天王級夢幻對決，只可以睇本土天王梅禮頂上打表演賽。
費天王喺當晚嘅雙打頒獎儀式完咗之後，向大家宣佈噩耗：「我嘅身體狀況令到我今晚打唔到比賽。」咁又係，佢前一晚先同華域加大戰3個回合，做埋訪問搞到凌晨先休息，鐵人都唔掂啦，何況係33歲嘅費天王。「我乜都試過晒，但係都打唔到比賽；去到我呢個年紀，如果要夾硬落場嘅話會有太大風險。」
欣賞唔到偶像英姿，雖然點都會有啲失望，但部份充滿正能量嘅fans話，其實費天王係為咗留力代表瑞士出戰今個星期五展開嘅台維斯盃決賽鬥法國，所以先退出年終賽決賽喎。而波都未打就自動封王嘅迪祖，喺臨時增設嘅表演賽輕鬆贏咗分組賽出局嘅梅禮8:5，都叫做以一場勝仗完成今個球季。呢位年終1哥喺休季期間，雙手將會由揸球拍變成抱上個月先出世嘅BB，可能仲辛苦過打比賽。
識睇，一定係睇足英台【英波Live】：
http://soccer.appledaily.com
http://bit.ly/engballlive