最近潮興科幻片，渣打一年一度舉辦嘅「藝趣嘉年華」都食住呢條水，糅合科學同藝術，喺維園中央草坪設有藝術攤位，以時空穿梭、太空天文、自然生態同機動工程四個科學理念貫穿，等小朋友邊玩邊吸收科學知識。
今年一連兩日活動，首次舉辦「夜光園」，前晚有夜光巡遊。噚日壓軸巡遊，搵咗600名青少年同藝術家，創作逾千件巡遊服飾，載歌載舞，仲有11組勁搶眼嘅12呎高巨型木偶、60個撐竿偶，𠱁到現場大人細路都好興奮。
主人家之一嘅渣打大中華區行政總裁洪丕正，都表現得相當投入，華華見佢喺台上不時拎出手機影相，全程笑容滿臉，父愛洋溢，可能因為佢自己嘅仔女𠵱家大晒，去咗外國讀書，唔似以前咁承歡膝下。佢自己都話，一見到小朋友咁活潑就好開心。
