啱啱過咗嘅周末、日，身兼全國政協常委嘅唐英年，返咗家鄉無錫打咗個轉，今次佢唔係去探鄉里咁簡單，而係去被「扑頭」、接受江南大學頒授名譽博士學位。其實唐唐曾經喺香港同美國多家大學被扑頭，但佢話今次係由家鄉重點大學所頒發，意義零舍深厚。八方聽聞，佢仲係無錫市第一個獲頒博士嘅人。做唔到特區一哥，喺家鄉攞返個no.1，做「江南」第一才子都唔錯吖！
延續爺爺扶貧使命
呢個江南大學嘅名譽博士學位，係由國務院學位委員會頒發，來頭唔講得笑。點解會被「扑頭」？相信同唐家喺家鄉嘅貢獻有關。唐唐嘅阿爺唐君遠，一直支持內地教育，仲成立咗唐君遠教育基金會，江南大學嘅君遠學院更加喺2010年12月成立。而唐唐2013年底則接任埋基金會理事長，延續爺爺扶植貧困學生，獎勵教師嘅心願。
話晒都係第一，唐家上下好高興，唐太Lisa同阿仔嘉盛都有去打氣，見證老公、老竇好威威。唐唐喺致辭時話，由於祖父輩十幾代人都長居無錫，攞到呢個殊榮格外興奮，繼而佢呼籲青年人應以一步一腳印務實方式實現理想，言外之意，唔知有幾多人會覺得心照？
李八方
mailto:[email protected]