趁住噚日長者日，長者安居協會宣佈「平安鐘」服務擴展至少數族裔長者，建立無種族界限嘅 「平安文化」。原來香港有高達45萬嘅少數族裔；除外籍傭工，11萬係常住居民，居港嘅少數族裔老齡人口都有增加，但唔少少數族裔長者卻礙於語言障礙，被迫留喺屋企，遇有緊急事故時，亦唔知點樣搵人求助。
長者安居協會喺去年未雨綢繆，籌備「平安鐘」服務升級，訓練少數族裔呼援關懷服務員，至今已經有三位受訓完畢投入服務，不時同約30位少數族裔長者密密傾。喺香港土生土長嘅巴基斯坦裔Ali係其中一位，佢話希望同聲同氣下，可以畀到長者最適切嘅照顧。