快「落」嘅時光過得特別快！日本央行10月31日爆冷加碼量寬後，日圓兩周大瀉6%，上周五已逼近117算。見報之際日本第三季GDP已揭盅，條數結果唔掂，淡友勢必乘勝追擊，120算指日可待。
油價難返家鄉
受調高消費稅打擊，日本第二季GDP勁縮7.1%，市場估計第三季錄2.2%增長。不過，日本4月加稅後消費明顯弱晒，加上近月油價大跌，為日本通脹帶來下行壓力，就算第三季經濟有驚喜，安倍政府亦極可能推遲到2017年至進一步調高消費稅，除非黑天鵝，日圓中線都係難翻身。
油價堪稱另一隻落水狗，紐約期油上周五跌至每桶73.25美元四年新低，導火線係石油輸出國組織呢個霸權已經不中用，喺美國頁岩油搶佔市場嘅威脅下，油組唔敢減產托價，以免市場份額比美國佬侵蝕。雖然筆者認為油價再跌空間有限，但刻下情況有如回鄉證失效的學聯三子，短期要返家鄉難過登天。
回顧上周美元表現，美滙指數微跌0.2%，日圓、巴西雷阿爾和英鎊包大艇，反觀紐元、南非蘭特和澳元幾隻高息嘢，上周反彈1.3%至2%，反映息口因素下爛船仍有三斤釘。英倫行長卡尼預警明年通脹跌穿1%，加上暗示明年上半年加息機會渺茫，英鎊插到落1.5593的14個月低位，短期撈底不如沽yen好過。
奇兵
本欄逢周一刊出