震驚！幾支歐洲魚腩喺呢兩日集體翻生，齊齊搶分成功，世界排名包尾嘅聖馬力諾喺主場創造奇蹟，以0:0守和愛沙尼亞，開出6.9倍嘅和波。聖軍終止連輸61場嘅恥辱紀錄，仲拎到佢哋喺歐國外史上嘅第1分！
歐洲區中聖馬力諾絕對係魚腩中嘅魚腩，世界排名208位，同不丹並列包尾。國際足協計排名係參考球隊近4年嘅成績，以業餘球員為主力嘅聖馬力諾真係魚腩到連續4年1分都冇！包括國際友誼賽、世盃外、歐國外，呢個位於意大利國土中嘅小國已經連輸61場；佢哋上次唔使輸波已經要數到2004年，喺友賽贏另一支魚腩列支敦士登1:0。直至上星期六，奇蹟降臨。
守和愛沙尼亞創歷史
佢哋喺歐國外E組迎世界排名88嘅愛沙尼亞，全場劣勢，得3成幾控球，射門亦少過對手，好在門將施蒙斯尼撲咗5個波，幫球隊史上第3次保持清白之身，以0:0完場，攞到史上喺歐國外嘅第1分。聖馬力諾隊長安迪施華感嘆：「我仲記得04年嗰場贏波，嚟到今日，我已經差唔多等咗11年。咁多年來，我哋其實都可以避免連敗，但係我哋衰把握唔到機會。」教練文沙路尼就話：「近幾月我哋刻意加操，呢場係訓練嘅成果，係對球員嘅獎勵。希望可以激勵到球隊，等好成績陸續有嚟，唔使又等多10年！」
列支敦士登法羅群島報捷
喺G組、世界排名155嘅列支敦士登都爭氣，同日作客以1:0擊敗摩爾多瓦，開出10倍冷W，係佢哋近10年來首次喺作客嘅正式比賽贏波。列支敦士登近年都有啲佳作，贏過立陶宛、冰島同拉脫維亞，都算係一支有骨嘅魚腩，間中可以鯁死啲歐洲3線弱旅。講到最威都係上周五F組嘅法羅群島，佢哋爆冷作客贏希臘1:0，搞到對方教練雲尼亞里執包袱走人。
識睇，一定係睇足英台【英波Live】：
http://soccer.appledaily.com
http://bit.ly/engballlive