銀行界長跑達人──恒生銀行（011）公關阿頭張樹槐（水哥），不時接受報紙訪問，暢談馬拉松經驗，喺電台開咪講都算新鮮。上星期五，佢喺港台節目《晨光第一線》，接受主持人何嘉麗訪問講「超越馬拉松」呢個主題。
時下興贏在起跑線，但水哥到千禧年，過咗四張嘢先落場跑10K，一把年紀攞苦嚟辛，佢話係因為當時受到維珍航空創辦人布蘭森嘅自傳激發，令自己好想尋求新突破。
另一個要多謝嘅啟蒙者，就係鼓勵佢跑步嘅恒生同事楊子江，對方仲教佢跑步技巧，同埋借咗好多關於馬拉松嘅書籍畀佢研究。
跑馬拉松唔講輸贏，水哥話最美一刻，係跑到淨低半條人命，終於抵達終點，發現原來自己可以做得到，呢種「馬拉松境界」，未落過場嘅人係無法體會，所以佢鼓勵大家一定要試試。
據聞嚟緊呢幾個月，逢星期五大清早，水哥都會繼續透過呢個節目，喺大氣電波分享長跑閱歷。