美國大學畢業生考MBA入學試GMAT，雖然在英語部份佔盡先天優勢，但在計量（quantitative）部份落後中國印度韓國學生甚遠，拉低總成績之percentile，令競爭學位時陷於不利情況，令美國MBA取錄新生被逼考慮埋其他因素，形成變相保護主義。美國學生啲數學點解唔掂？我哋喺美國到超級市場購物付款時，收銀員每碰到華人俾一百美元，買貨49.99元，就不知所措，冇計數機在旁就死晒火，可見佢哋讀書時，對啲基本加減乘除算術，冇乜認真做功課。唔怪得有啲美國大學商學院收生部門建議美國學生自小學開始，就計多啲數，勤力讀好數學。
現在香港家長好鍾意送子女讀國際學校，狂谷英文，點知道幾個星期前華爾街日報有篇報導，引述美國一啲研究報告及香港教育學院兩篇研究報告，指美國學生啲數學唔掂，可能係用英文讀數學有關。據講亞洲國家語言如中文、梵文、阿拉伯文等等，講一到十，至二十以上，皆係「十」加個「一」，例如11就係十加一，十二就係十加二，好易記，但英文11係eleven，12係twelve，13係thirteen，係三個「獨立」詞，小學生有時腦筋轉不過來……嗰篇報導講得幾有趣，但有關內容及主要論點，左丁山已經唔係幾記得，但要義就係好清楚，中國細路用中文學習數學一定叻過用英文學數學，想子女他日成為丘成桐或者退而思其次，做到工程師識計微分方程式嘅，要記住呢點，天才當然係例外。此或者解釋得到英國、美國學童在PISA嘅數學測試，往往得分低於世界平均。
不過數學成績好又未必一定要讀MBA嘅。呢日與幾位商界人士坐在一起，知道有一啲內地高考狀元級人馬，數學成績特優嘅，入咗本港大學主修商科/會計，大家竟然齊聲叫一聲：「嘥咗噃，佢地應該主修數理或工程吖，讀會計駛乜數學尖子！」我地明白搵工嘅壓力，主修會計梗係易搵工好多，但人人如此諗，科學界何來新人才？最現實咁講一句半句，億萬富豪彭博就勸美國青年，如果你地唔係可以入到頂尖大學，而係普普通通攞到一個普通學位，仲要孭上一身學生債（student loan）嘅話，若果入行學師做plumber（水喉匠）仲好！粗粗地，通渠佬在美國更易搵工、更有叫價能力呀！呢個就係供求問題，人人讀大學唔肯做水喉佬通渠佬，後者自不然就奇貨可居，故此彭博先生有感而發呀。