全城期待已久的滬港通今日正式開閘，從此港燦老散可以北上買A股食大茶飯，而強國股民又可以南下搵食，大家同撈同煲，同場競技，一起進入大時代！
筆者早排上深圳證券行打躉，認識在銀行工作的老胡，自稱在投資QQ群上有200個粉絲，有好多人信佢。老胡是否吹水就唔知，不過佢話，內地的大戶多數都一早開咗港股戶口，連佢自己都炒過騰訊（700），所以唔覺會有好多內地錢因滬港通再落嚟香港。
A股資金八成來自散戶，機構投資資金只佔兩成，與香港恰恰相反。港股通要求賬戶餘額要有50萬元（人民幣．下同）先買得，A股是由散戶主導，目前戶口有多過50萬元的股民只佔不足4%。
呢啲人對港股通有幾大興趣，恐成疑問。老胡所講會否成為事實，就要睇今日落嚟的南向交易金額，會否打爆港股通的即日額度105億元喇。
至於香港人買上去，就冇資金方面的限制，只要有證券戶口，就可以買名單內的500幾隻上海指數成份股，或AH都有上市的股份，只不過就用人仔結算。而北向交易的滬股通的每日額度為130億元，就多過南向交易。
李可強