原本話明年3月舉行慈善個唱嘅民政事務局前常任秘書長楊立門，唔知係K蟲咬定想暗撐雨傘運動？下月2日將會同香港青年合唱團，喺文化中心公開演唱以革命為故事背景嘅《孤星淚》。
去年電影版《孤星淚》大熱，片中一曲《Do you hear the people sing？》更成為今次政改主題曲之一；而呢次只演一場嘅「孤星淚音樂會」，陣容除咗有「外部勢力」，AO歌王楊立門都係演出者之一，飾演故事中嘅「主教」。《孤星淚》入面，走投無路嘅男主角被主教收留，卻因偷咗主教嘅銀器被警察捉咗，點知主教卻叫警察放佢一馬。楊立門呢次做大好人，唔幫警察幫弱勢，唔知會唔會有人唔like？