上周本欄以「反彈可期」作為標題，想唔到滬港通贈興，開市前約一小時港交所（388）突然公佈，滬港通將於今日啟動，並指周內會交代各項細節。市場還未趕得及消化之際，期指隨即裂口高開近600點。
另外，接近全線藍籌股、兩地證劵股、A股ETF及相關概念股亦裂口高開，當日於電台節目亦提到，最值得短炒嘅係AH差價闊嘅股份，夠晒舒服，例如大連港（2880）及上海電氣（2727），上周兩股走勢亦證實當時想法。
期指好倉先食一半
既然滬港通今日通車，為了解A股市場生態，我亦向相熟證劵行及銀行客戶服務查詢買賣資料，得到的回覆竟然是稍後告知，連從業員亦不清楚如何交易，一般散戶及投資者可從哪裏得知買賣細節？就算有一絲衝動想北上買股，但從業員嘅反應難免令人熱情冷卻。滬港通爆唔爆看來要睇大戶的反應，因此今個星期一定要留意港股通額度，萬一中午都用唔到一半，咁自4月10日以來股價升咗逾四成嘅港交所（388），將面臨很大嘅壓力，短線回調機會很大。
不過，港交所今年上半年平均每日成交金額只有629億元，若中長線港股通能每日帶來百億元成交金額，港交所始終受惠不少，更何況磨刀霍霍嘅深港通相信會係2015年到來，周邊國家嘅交易所都想通車，所以這次短線調整，應該係中長線低吸嘅機會。
另外，上周五滬港通稅務問題終於有明確消息，內地人南下買港股免收三年資本增值稅，而港人及海外投資者北上買滬股則獲暫免徵資本增值稅、企業所得稅及營業稅，但紅利稅則仍要繳交，早前市場嘅擔憂一掃而空，那今天勢必裂口高開，我們個幾月前一直講嘅24300首個目標隨時到達（24200至24300我已收貨），越開得高，反高潮嘅機會越高。
雖然我對後市仍然睇好，但到達首目標，點都會平一半期指好倉，餘下另一半就放紙鳶先；股票方面，AH股概念炒了咁耐，我都會鳴金收兵，無其他國策概念的，會先行獲利，有概念的就先平一半，情願繼續埋首細價股及其他國策概念股。
滬港通會對市場帶來新衝擊，甚至兩地名單上股份有機會跑贏大市。而要比較不同概念或板塊股份，不可能憑空去說強弱；而單單抓着一、兩隻焦點股作代表，則容易見樹不見林，以偏概全。
惟目前市面上，仍未有跨市場的指數涵蓋這一籃子股份的表現，有電台開先河，今日開始會公佈新指數，該指數係比較每日自由流通市值變化而成，而當中分為三個指數，一、港股通的港股；二、滬港通的滬股；三、滬港通的滬港股。
以上三項指數均採用「自由流通市值加權法」計算，指數基礎日定為滬港通開通前一個交易日，基點1,000點，這樣大家可以比較滬港通開通後，有資格參與買賣的滬港股是否優於其他股份，滬股還是港股跑贏，一目了然，假以時日將各可自劃出不同的圖表，從而客觀分析市況，並作出最適當的資產配置。
張士佳