李心潔與彭順的婚姻因為男方偷食而一度陷入危機，冷靜過後，事情終於雨過天青，走出陰霾的心潔直言：「人生係苦呢個係一定嘅事，喺生命中遇到啲唔同嘅事，咪盡量利用你嘅智慧，去苦中作樂，遇到挫折，咪盡量用正面嘅角度去睇件事，轉負為正。」
撰文：何慧斯
因為香港電視開台劇《選戰》即將上映的關係，心潔一口氣接受連串訪問，外間最關注的，當然是她與彭順的婚姻如何繼續走下去？日前接受專訪的心潔雖然絕口不提小三Liddy（李悅彤）的是與非，只是感激當日彭順偷食事件曝光後，大家對她的關心，同時亦為大家的擔心而感到抱歉：「因為我係藝人，所以好多生命中嘅事，好似公開晒畀大家知道，但係事實上每個人生命中都會有唔同嘅經歷，每個人生命都係一本書，可以拍成唔同嘅電影，唔淨係婚姻，仲有同父母嘅問題，總之人與人嘅相處係最難嘅一個課題。」
活在當下 轉負為正
對於禪修六年的心潔而言，絕對是一個大考驗，她說：「人嘅生活太多姿多采， 好少有時間靜落嚟，尤其係我哋呢一行拍戲嘅，情緒係咁樣起起落落，所以真係要有一個方法，令自己好快咁返到一個平衡點，俾自己靜落嚟，當你靜落嚟之後，心有力量，好多嘢就會睇得清楚啲，知道點樣正面咁面對。」心潔又表示：「做人仲有好多不足嘅地方，有時會好自私自我，所以點樣處理好人際關係，呢個仲要學習，一段關係喺過程中一定有起起跌跌。面對挫折嘅時候，我會同自己講需要時間。一開始一定會問發生乜嘢事？等自己冷靜落嚟，就要慢慢去面對，然後就會一日比一日睇得清楚，自己能力可以忍耐到幾多，做到幾多，慢慢去了解成件事。」
思考過後，最終得出甚麼結果？心潔坦言：「其實我哋一齊嗰時，我都有過最低潮嘅時候，佢都好包容我，一直帶領我成長，今次遇到咁嘅事，大家傾過都覺得可以再繼續一齊，咁咪一齊面對，一齊去處理，但係唔知將來會點？可能到時大家都會變，但係喺呢一刻，活在當下，我哋都好認真想再一齊。講真，人與人嘅愛最珍貴係可以同甘共苦。」心潔更有感而發地說：「人生係苦呢個係一定嘅事，喺生命中遇到啲唔同嘅事，咪盡量利用你嘅智慧，去苦中作樂，遇到挫折，咪盡量用正面嘅角度去睇件事，轉負為正。呢次係大衝擊，對我哋兩個一定有所啟發，令到佢更加珍惜好多嘢，明白咗好多事，即係好似一個小朋友咁，就算做錯事都唔會唔原諒佢！」
世事無常 別太在乎
言談間心潔重提往事，表現平靜，有別過往的拘束，她直言：「𠵱家做人比以前自在好多，以前我好在乎人哋講乜嘢同寫乜嘢，成日會同人比較，好在乎得失，但係𠵱家知道好多嘢係無常，無論你得到幾多，有一日都會失去，所以真係唔使太過在乎。好感恩可以喺咁複雜嘅環境下禪修，我比更加多人睇到更複雜嘅環境同人性，令我睇得更加多嘢，咁多年禪修，最大嘅領悟，就係搵到內心真正快樂真係別無所求，但係呢個要慢慢嚟，唔可以一下子就做到。」
生活經歷 助演角色
坦承面對任何問題，的確可以更加認清事實，但原來在演戲事業上，亦有一定幫助，心潔說：「如果真係繼續想做演員，真係要搵個方法幫自己，我覺得禪修幾好，所以呢幾年我嘅情緒好穩定，雖然又要拍戲又要處理屋企啲女嘅事，但係每日都會盡量抽時間打坐。」她續說：「好多人問我做戲難唔難，但係我真係想講，戲係冇得做，每一個角色都係你自己，只係睇你點樣去發揮，所有戲裏面嘅感情都係真實，有個面先可以呈現出嚟，唔係做或者演出嚟，所以每次有新角色，都要睇吓自己有冇擁有呢個角色嘅特質同能耐。」
至於再拍劇，心潔則表示：「其實我從來都冇排除拍啲乜嘢，只係要有個完整劇本，接拍嘅成數會好高。呢個係我嘅責任，作為一個演員，有責任去做好個角色，如果劇本都唔畀我，我點會有信心去做好，所以我寧願唔做，費事俾人鬧，人生只係短短幾十年，無謂令自己咁痛苦。如果係幾年前叫我做葉晴（新劇《選戰》扮演特首候選人）呢個角色，我一定做唔到，不過有咗呢幾年嘅經歷，加上我又肯接受喺呢個年紀願意注入啲新嘢，好似結婚咪結婚，照顧小朋友就照顧小朋友，只要你肯做好唔同生活嘅角色，所有好嘅表演，就係最真實嘅情感。」
化妝：Yannes Lee @ ND&Co.
造型：Domanic Tao（Pi4.hk）
assisted by Sonn Lam（Pi4.hk）
場地提供：港威酒店
【三個粉絲去首爾】
追星實錄，即上韓劇讀： http://hk.apple.appledaily.com/kstar