早排又去金鐘同人吹水，講到體育運動，令人着迷嘅地方，其實就係挑戰緊「不可能」，將佢變成「可能」。
正常人骨架力量，點會踢得出卡路士嘅經典弧線波？施丹（左）嘅精密控球，點解冇乜人做到？馬勒當拿1986年對英格蘭一斬六又點會做到（上帝之手又過到骨）？點解你見到自己隊波下半場連追3球反贏對手會記一世？世界盃哥斯達黎加同智利喺分組賽爆發小宇宙打低傳統勁旅，點解睇電視打Golf同英式桌球好似好易入，但你攞住支嘢半日都未入到波？每個運動員其實都喺自己專長裏面不斷自我挑機，先至有咁多估佢唔到嘅嘢出現。運動魔力，不論你係參與者定係旁觀者，都會喺你腦部產生一種刺激物，導致類似高潮感覺，呢樣嘢係天賜嘅。
除咗體育運動本質，項目上嘅不公平制度，都係運動員要突破嘅嘢。最近睇過一篇網文，講波士頓馬拉松，原來喺1972年至有女性參與，因為之前美國業餘田總一直認為女人體格唔啱玩呢味嘢。直至1966年有個叫Bingay嘅女人，由於太愛長跑，走去「公民抗命」插咗入隊一齊跑，仲贏咗過半男人，大會震怒。1967年又有個叫Switzer嘅女人偷跑，大會仲想扯甩佢塊號碼布但失敗，結果喺繼續爭取下1972年波馬終於受女人玩。
今日嘅合理爭取，都係想將「唔可能」變成「可能」，大家放長雙眼。
梁栢堅
填詞人+彩池人