球場事球場了，有啲男人之家平日好地地冇乜脾氣，但一落場就唔係人咁品，人辦？就梗係我自己啦，踩自己好過講人是非嘛。
每隊波都總有個天生異稟嘅好波之人，唔多嘢講但一講就嚇死人，我大專隊波入面都有一位。仲記得放學有次搭地鐵，兩條友逼埋嚟車門口位，被迫一齊近距離睇住車門玻璃倒影，突然佢講咗句驚為天人嘅真話：「其實我哋兩個咁靚仔，無理由識唔到女朋友㗎！」我只係向住倒影輕輕一笑。唔好誤會，呢一笑同靚仔無關，而係代表住我哋友誼更進一步，惺惺相惜！
後來我先知呢一切都只係幻覺，我哋邊係朋友呀？話說有日放學後準備同隔籬班鬥波，我喺場邊熱身可能係認真咗啲，大腳一抽時撻Q，兜口兜面省到換緊褲嘅呢位好波朋友，我衝過去想扮死狗Say Sorry，點知佢㷫到爆，我未擘大口佢就一句X你老X呀咁向我大罵！我無嘢可以做，惟有絕交。之後就算同場踢波，都各有各踢，但少咗佢助攻，我就更無表現，但為咗啖氣，足球生涯走下坡都冇計！
啱啱出嚟做嘢，同一班行家踢衞生波，為咗令到啲前輩印象深刻，我使出最耍家嘅無腳影捉滿場飛絕技，諗住會博到唔好波但好勤力嘅正評啦，點不知踢唔夠5分鐘，正當我由左後個位跑去右後面幫腳之際，右後衞好惡死咁問我踢咩位，走過嚟做乜？乜踢波唔可以走位㗎咩，打棒球咩家陣！為表示不滿，我之後都冇再踢呢隊波，可惜嘅係，冇人表示過可惜。
仲有一單躁嘢不吐不快，有位朋友呢係好鍾意命令隊友走位同畀波，通常喺你有波在腳想畀個靚位時佢會大聲提議：畀到腳吖唔該，咁你想畀到腳嘞，佢又會一面無奈咁表示點解唔畀位呀！好，有一次我又冇跟Order做，阿指揮官今次竟然大呼大叫走到我面前：「你究竟明唔明呀！」我擺明駁嘴：「唔明，但可唔可以完場先再傾呀！因為對手都已經開緊龍門球喇！」佢答案係：「唔得，講埋先！」哈，但係佢想講都冇得講，因為我為咗耳根清靜，已經趕咗自己出場！
講到呢度，你應該明白踢波其實最有破壞力嘅係把嘴，而唔係對腳！而你亦都應該明白，點解冇乜人搵我踢波！
KEYMAN
節目主持