意大利騎師杜滿萊上季來港策騎，技驚四座，上星期日在沙田贏得三場頭馬，充份證明佢係世界級騎師，佢之所以嚟香港客串，主要係因為意大利經濟不景，賽馬事業低迷，令佢蓄意到日本發展，香港只係中途站。去年佢在日本考騎師執照，肥咗日文，今年決定惡補日文再考，聽講攞牌機會好大喎。日本賽馬事業興旺，育馬賽馬一條龍，形成一個封閉體系，對外國騎師打入日本馬圈，有嚴格限制，要保護日本騎師生計，世界級高手話知你吖！好一個杜滿萊，為搵食不惜低聲下氣，照足日本規矩去考牌照試，一旦考到又如果日本馬主肯為贏馬而贏馬，唔夾硬保護日本騎師，俾馬杜滿萊騎嘅話，杜滿萊攞日本騎師冠軍絕無疑問。
日本人派馬出外參加大賽，係要用日本騎師，於是在實力相當、短兵相接嘅時候，日本馬必敗，只有在明顯高一皮嘅場合，日本馬先至可以贏。十月尾香港騎師冠軍潘頓騎日本馬「愛發達」就輕鬆贏咗澳洲一級賽「覺士盾」啦，睇得出潘頓比日本騎師零舍高出一皮。
保護主義係可以為本地人保住份工，但日久就冇咗競爭力，難以在國際舞台爭雄。財務B話香港年青學生心理恐懼大陸學生競爭，本地大學理工學院內尖子學生盡是內地人，令本地學生不安。這當然係實情，但香港斷不能因為咁而要大力限制內地學生來港，保護性措施對香港學生無益，長遠對香港整體有害，香港要繼續做世界級城市，只好諗計吸納世界級學生及人才，而唔係唔俾佢地嚟。
到美國讀MBA，一定要考GMAT，左丁山讀大學時代，同學考呢啲試幾乎個個考數學得滿分，考英文就僅僅及格，因為美國啲數學實在容易。到咗2013年，據華爾街日報報導大量亞洲學生，尤其是印度中國學生考GMAT嘅數學部份，如斬瓜切菜，平均分係45（滿分51），全球平均38分，美國學生十年來無進無退，得平均分33左右，於是為哈佛史丹福等大名校帶來難題，如果全部以分數取錄，美國學生咪在MBA班變成極少數？非精英尖子美國學生，如何與中印韓學生競爭（印度人因英文好，更厲害）？目前呢樣嘢係美國MBA名校收生取捨之大難題，也是美國科技公司競逐中印科技博士生嘅主要原因。