Chok樣男神林峯呢日出現喺沙田馬場出現，仲有拉頭馬，賽前先拉一匹假馬，做佈景板畀記者拍照，佢女友千語BB並唔喺身邊，到了第二場五班1400米李廐「大地王者」勝出後，峯峯亦有喺凱旋門出現，拉真嘅頭馬。原來食肆老闆幟哥黃永幟明知他與峯峯一班老友大地團體的「大地王者」有機會，特登CALL峯峯入場，一齊開心下，而馬兒最終爆14倍WIN，在黎海榮胯下擊敗亞、季軍「軍號」、「大眾良駒」。
峯峯謙稱跟幟哥入嚟見識下，感受一下跑馬嘅刺激。被問到有冇興趣好似郭富城咁做馬主時，峯峯話自己都好想一試，因為覺得好新奇，啲純種競賽馬亦好魁梧好有線條，好想擁有一匹。不過峯峯笑言自己仲未係馬會會員，但即將會申請。咁就奇喇，係人都知峯峯老竇林國華有「廈門李嘉誠」之稱，峯峯自己亦咁有地位，照計應一早入咗馬會。據知馬會好希望多啲頂級藝人做馬主，如果馬會知道峯峯有興趣，分分鐘遞份表格畀佢申請。
講番幟哥，家陣擁有「搖錢樹」、「為食仔」兩駒，佢隻團體馬「搖錢樹」本月9號上陣勝出，當日幟哥冇入場，錯過拉頭馬，好在「大地王者」呢日爭氣，戥下朋友開心，仲可以同林峯一齊影頭馬相，算係最佳補償。