馬主同騎練一樣，旺起上嚟都可以起勢贏馬，「美麗」系馬主郭少明家族係最佳演繹者。繼日前由自己公司贊助之莎莎婦女銀袋日憑「美麗大師」食尾糊後，今日又憑「美麗里程」同「美麗之星」一冷一熱起孖，「美麗之星」在蔡明紹胯下沿欄由頭帶到尾，勇奪第八場一班1400米樂聲盃，開季連跑三場第二後，卒之擔正贏番場，二、三名分別係「誰可拼」同「天合」。
「美麗之星」今場跑一班千四米，排五檔係季內最好一次，蔡明紹果然能夠幫佢把握機會，此駒越放越順，拉士回氣再爆一段，掟甩所有對手率先衝線，反觀「誰可拼」同「天合」得個追字，始終唔能夠超越前駒。郭少明今日親自到場拉頭馬，佢盛讚東廐陣營靠得住，以後將會繼續買馬支持。查開季兩個月，郭家已有「美麗大師」、「綻放美麗」各自兩捷，「美麗里程」、「美麗之星」則一捷，合共已贏六場，收獎金收到手軟。
郭少明說:「『美麗之星』近幾仗都放得有點急，告東尼今場教蔡明紹，雖然要放但必須嚴格控制步速，紹仔依足指示，加上此駒今季持續有進步，人馬表現令我滿意。『美麗之星』的評分未必可以入選國際賽，如不入圍，告東尼會部署牠跑12月14日國際賽日的一班1400米。」