成日話李易達馬房寶藏多，事關由李廐他投之馬隻隻識贏，有啲好似當年「太陽好好」咁，仲贏到開巷。呢日三T頭關，又見到「手到拿來」益容天鵬，此駒轉倉初出跑第四場四班千二米，藉輕磅之利由頭帶到尾，力壓大熱門「雅寶」取得服役第一W，質新分子今季初出即贏，帶挈埋首日客串之意大利猛將李寶利順利打響頭炮，賽後即有女fans向他索簽名；容天鵬亦繼日前「觀自在」後，再憑四歲馬於日賽數糊；第二、三名分別係「雅寳」同「幸運日」。
原本「手到拿來」轉廐即勝，李易達又試畀人剃眼眉，可幸係佢呢日第二場已經爆冷建功，贏出昔日由梁定華訓練之「大地王者」，幫自己打定底，否則真係會更失威。比較唔開心嘅可能係楊明綸，皆因佢一手操住「手到拿來」，點知唔好彩撞正自己今期停賽，變成有份操冇份贏，眼白白送咗場頭馬畀李寶利。