立法會內務委員會噚日選出調查高鐵延誤嘅專責委員會成員，一般嚟講泛民同建制派事前都會傾掂數，但𠵱家邊有呢支歌仔唱，社民連長毛噚日變身程咬金，突然彈出嚟選，雖然最後鎩羽而歸，但係都有六票，明顯唔只長毛自己、人民力量兩個同埋無黨派黃毓民投咗畀長毛啦。
選舉完咗之後，自由黨田北俊笑住離開會議室，一見到八方就主動報料，話佢為咗營造「和諧社會」，專登吩咐黨友張宇人同埋易志明投票畀長毛。政治上果然冇永遠嘅朋友或者永遠嘅敵人，田少同長毛無論政治抑或經濟上嘅理念都南轅北轍，但估唔到佢可以為咗「和諧」二字撐長毛，相信有啲聲稱要搞香港營嘅人學唔到㗎喇。