讀書不是求分數，會考取得0分恥辱的裕美，叠埋心水入行做歌手，出道第一年已勁賺過百萬，但翌年卻患上抑鬱，試過𠝹手自殘。現年只有26歲的她，人生經歷已經好「豐富」，去年更榮升人妻，在樂壇浮沉至今，已經3年沒出新碟，裕美依然不想放棄唱歌：「我唔會死心，音樂就好似我老公，可以煽動我嘅靈魂。」
採訪：余燕儀
於14歲參加02年全港普通話歌唱大賽，奪得冠軍後入行的裕美，自細已很喜歡唱歌，她日前接受本報專訪說：「可能細個父母成日打交，自己變得唔想講嘢，只係好想唱歌，覺得歌詞啱我心情就唱，加上媽咪後生唱酒廊，可能有啲遺傳。我覺得音樂可以帶畀人歡樂、舒緩壓力同煸動靈魂，但冇諗過入娛樂圈，參加比賽驚到腳震手震，點知竟然畀我贏咗，嗰晚笑到合唔埋口，之後簽咗叻哥（陳百祥）。」
聲帶受損要停工
等了4年才推出處女碟的裕美，怎知入行一年後患上抑鬱：「因為第一年搵到百幾萬，個心開始雄同囂，點知聲帶有事做手術，要停晒所有工作，加上公司內部好多問題出現，嗰時好擔心，眼見其他同期新人日日見報，心諗『佢哋追上我啦！』當自己冇嘢做時，平日搵我去蒲嘅人唔見晒，有啲就好熱心打嚟關心我，我講咗啲嘢畀佢聽，點知第二日就見咗報，所以好驚人同唔敢相信人，閂埋門唔出街。」
初時裕美還不知自己有病，之後情況越來越惡化：「開始鍾意對鏡、枱凳講嘢，望到自己個樣覺得好醜，好憎自己，試過食咗成包幸福傷風素，又用刀𠝹手同撼頭埋牆，我唔係諗住自殺，知道要照顧媽咪，只係糟躓自己，𠝹到隻手流晒血，覺得幾好幾舒服喎。嗰時公司幫我建立嘅形象係好開心，但自己係一個好負面嘅人，所以要扮開心，試過講錯嘢畀同事鬧，好大壓力，拍拖又唔畀出街，越賺多錢同家人關係越唔好，我有事時男友又離開我，可能一鋪過爆出嚟承受唔到。」
跌磅致平胸面黃
結果裕美被親人捉去睇醫生，發現她有中度抑鬱：「食藥初頭好好，情緒冇咁激動，可以瞓到覺，但去到某個情況，食三粒安眠藥都冇反應，食嘢又嘔，瘦得好緊要，除咗得個頭，胸、pat pat都平晒，面又枯黃，都會埋怨點解會咁！」幸好當時她遇到高皓正，帶她認識耶穌，憑宗教信仰戰勝抑鬱：「多謝高皓正，好多人遺棄我，佢會成日打畀我問係咪唔開心，終於我好想同人傾，一五一十講佢知，佢話幫我祈禱，帶我認識耶穌，自從抑鬱好番之後，我信咗耶穌，做番好單純嘅自己。」
做回自己的裕美，跟公司解約後在樂壇載浮載沉，現已3年沒出碟的她，曾懷疑自己是否不適合在娛樂圈生存：「眼見啲人講嘢好叻，好識討好人，用一啲招數爭取工作，但我唔識做亦唔想咁做，我唔去強求，做好自己就得，唔會因為唔夠人紅唔開心，反而欣賞叻嘅人，自問唔係聰明，但我對唱歌好有信心，呢樣係我人生裏面最叻嘅嘢，紅唔紅唔緊要，我真係好鍾意音樂，我唔會死心，音樂就好似我老公，可以煽動我嘅靈魂，no music no life，攞住支咪就唔記得憂愁。」
場地及服裝：Novelty Lane
【三個粉絲去首爾】
追星實錄，即上韓劇讀: http://hk.apple.appledaily.com/kstar